近來, 跟老婆番多左教會, 對基督多了點認識.
教會每周都會有團契, 講者多套用一些聖經上的片段, 分享一些個人睇法.
但係, 唔知我係咪職業病發作, 我聽道期間會發現一些讀音有異既字, 現拋磚引玉, 又同大家分享下:
1. 褻瀆 褻瀆, 意思解侵害冒犯神明, 好多人讀左'舌續', 但好似應該讀'舌毒. 可見此行為好鬼毒!
2. 瘸子 意思係跛左腳既人, 普遍都讀'茄'或'GUR', 但正音應讀'騎子'. 讀'茄子'會變左味餸, 街上不會有茄子暴走!
3. 藉口/藉著 好多人讀做'直口'或'直著', 其實讀'直'係姓氏才用, 應讀做'借口'及'借著'先啱! 藉著耶穌確係要'借'衪的力量也!
4. 彌撒 應該讀'眉殺', 唔好問我點解, 我唔知!
5. 玷污 即整污糟啦, 不讀'尖污', 讀'店污'好似正音D. '尖污'要用水, 你無理由講錯野會嘖口水'沾污'倒神明!
6. 誹謗 即唱衰, 多數俾人讀'匪綁', 其實讀'匪磅'.
7. 螫人 即昆蟲或蠍子咬人咁解, 好多人讀'斥人', 甚至有人讀'吉人'! 其實螫人應讀'識人'先啱. 蠍子'識'你架, 死未?
8. 酒醡 壓酒用的酒槽, 人多讀'酒作'或'酒窄', 其實讀'酒炸'!
9. 最後, 有個詞彙叫'神祇', '神祇眾多'即眾多不同既神明偶像, 好多人讀為'神紙', '神抵', 其實, 正音係'神奇', 眾多神'奇', 你話奇唔奇?! 咁幾時讀'只', 只有'祇有'時, 才讀番'只'!
其實, 可能基督教對於以上發音有一定規定, 本人才疏學淺, 若有錯漏, 請各教會人士不吝指正! 歡迎轉發, 真理應多辯益明!
Search